قصيدة عن المغالاة في الزواج في ظل الظروف الإقتصادية الطاحنة ...
..............................................
........... الحلم كوالتي ...........
..........................................
قلت لابويا لما ............. نويت
شوف لي عروسه تناسب حالتي
نفسي اتجوز وافتح ........ بيت
بس لقيت الحلم ........ كوالتي
أكبر مني ومن ......... أوضاعي
عايز شقه وشبكة ......... ومهر
وانا ع القد لحافي ...... شراعي
جوا النوا بعافر ........... قهر
شايل حمل تقيل ........ وبعاني
وقلبي الأخضر ........... شاب
والقلب إذا شاب ......... بيعاني
والعالم آسي ............. وكداب
ولاجل مانهرب من ......... حاله
عايشينها مابين برد ...... وشرد
وبرغم ظروفنا ........... القتاله
والحاله اللي ماترضيش ..... حد
دلوني صحابي ماقولتش ..... لأ
على بنت وكانت زايده ... جمال
فقصدت البيت وانا قلبي بيدق
وقالوا لي الناس على قد الحال
خبطت الباب فتحوا لي ... قوام
ورميت الضحكه وقلت ..... يارب
يتفك الكرب وتبقى ......... تمام
وبعد البوس وحبيب ....... القلب
بصت لي حماتي ونزلت ... رص
عايزه الفستان ومعاه الطرحه
وغوايش وماسات ......... بالفص
وشقه تكون واسعه ...... وبرحه
وجهاز كامل يملى ........ العين
وستاير ع الجنبين والنيش يترص
وحلق منقوش نازل بدورين
وبلاط م الغالي ... ماتسترخصش
ودهان فوشيا وبمبه مسخسخ
واوعي الغامق بيمص النور مص
والعجل تخين معلوف.... ومتختخ
والدخله أغاني وهيصه .. ورقص
تحجز صاله عليها ......... القيمه
وتعمل كوشه بزينه ........ ورد
والتصوير ولا أجدع .......... سيما
بنتي جميله وزي .......... الشهد
ولو هتوافق تملي ....... عينيها
واوعى تخش بإيدك ....... فاضيه
دا الخطاب هايموتوا ....... عليها
لاجل توافق وماهيش ... راضيه
واعمل الف حساب ....... لزعلها
شوف مطالبها قوام .... وارضيها
شيل من بالها اللي ..... يزعلها
وابدر بالأفراح ............ أراضيها
حسيت ان انا مدبوح وانا قاعد
وشربت ساعتها كاسات .... المر
والبخت مصاحب صاحبه ... وقاعد
والروح بتروح والدم ....... بيشر
طب اعمل إيه في دماغ أهالينا
واتعدينا حدود ............. الشرع
مات الزرع في بور ...... أرضينا
نزرع ورد بتطرح ........... قرع
العين شايفه الإيد ...... وهمومها
مات إحساس الروح ...... جواهم
حتى النور في السما ونجومها
ناشره غيومها سموم في هواهم
قولتلهم بصراحه والراحه بوغاشه
وقعدت اوصف في ..... الاحوال
الطلبات محتاجه .............. لباشا
وانا أصلا على قد ........ الحال
ولا وارث ولا عندي ...... وسيه
حتى الراتب ............ مابكفيش
عايش والأحلام ............ منسيه
حتى فلوس في جيوبي مفيش
شافت حالي الرحمه ..... وهجت
فز الجهل وعلى ......... الراس
قادت ناري في قلبي .... ووجت
دوسنا العفه بألف ........ مداس
دوسنا العفه بألف ........ مداس
..........................................
بقلمي الفلاح الفصيح
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق