……..آشْ ادَّاكُم………..ْ
آشْ ادَّاكُمْ
تْغَربْلُو المَاء
بْ غربَالْ الباطلْ
ؤُ تَتَّهْمُو السْحابْ
بْ لَعْگَرْ
بْغيتُو توَلْدوُ العَوْدَة
وانتُما ماشي طَاهْرينْ
آشْ هَاذْ المُنْكَرْ ؟
شْحَالْ قَدكُمْ
مَتْوَضِّيوْ الحَقْ
بْ تْرابْ رَجْليكُمْ
تْصَوْمُوه
صيَامْ دراري
ؤُ تحتافلُو بْ لَفْطَرْ
الغرْبالْ مَقَاد يْدَرَّگْ
عليكُم شَمْسْ النهارْ
وتْگُولو هَذَا مقَدَّرْ
نْهاركُمْ طويلْ
ؤُ لَفْطُور...
باقي تَالَفْ
آشْ هَاذْ لَغْدَر
الْكَدرَة تَغلي
فُوقْ الکَانُونْ
عَامْرَه غِي بْ لَحجَرْ
اللِّي يَستنَّى
فَارس العَدلْ
يَمْكَنْ عَوْدُو يَتعَطَّلْ
وَلَّا يَعثَرْ
رَاهْ مَهْمَا ...
غَطَّى الظْلاَمْ
شَمسْ الحُگرَة
لا بُدْ إيبَانْ
ضَوْ لَفْجَرْ...
محمد مهداوي
ليست هناك تعليقات:
إرسال تعليق